Monday, March 24, 2014

හොයලා දුන්නොත් රුපියල් 10,000.00 ක් ...




රෝසි නෝනා කියන්නේ බොහොම ඉහළ පෙළේ පන්තියක ඉංගිරීසි පන්නෙට හැදුන සල්ලිකාර නෝනා කෙනෙක්. ඔය රූපෙ ඉන්නේ රෝසි නෝනා.

 රොබින් කියන්නේ රෝසි නෝනා හුඟක් ආදරය කරන, දුකේදි සැපේදි රෝසි නෝනා ලඟම ඉන්න කෙනෙක්. රොබින් කිව්වේ රෝසි නෝනගේ මහත්තය කියලා ඔන්න පටලව ගන්න එහෙම එපා.. 



රෝසි නෝනගෙ මහත්තයා සෑම් පෙරකදෝරු මහත්තයෙක්.රොබින් රෝසි නෝනගේ ආදරය දිනාගෙන බොහොම සැපට හැදුනු බලු රාළ කෙනෙක්. 

 මේ ඉන්නේ රොබින් .....


ඔන්න ඉතින් දවසක් රෝසි නෝනා රොබින් වත් එක්කරගෙන ගෙදරට ඕන කරන බඩු ටිකක් ගන්න මාර්කට් එකට ගියා. 

එක අතකින් කුඩේත් අනිත් අතින් මාර්කට් ගෙනියන බෑග් එකත් අරගෙන අඩි උස සෙරප්පු දාගෙන රෝසි නෝනා ඇවිදින තාලෙටම රොබිනුත් රෝසි නෝන පස්සෙන් බොහොම උජාරුවෙන් තමයි මාර්කට් ගියේ.

මීට කලින් රෝසි නෝනත් එක්ක මාර්කට් ගිහින් නැති නිසා මාර්කට් ගමන රොබින්ට අලුත් අත්දැකීමක්. ඉතින් පාරේ තියෙන එක එක විදිහෙ දේවල දිහා ටිකක් ඕන කමින් බල බල ගියත් පාරේ හිටිය අනික් බලු රාළලා ලගින් යද්දි නම් රොබින් ටිකක් ආඩම්බර කමින් තමයි ගියේ.

දන්නවනේ ඉතින් කාන්තා පාර්ශවයේ අය බඩු ගන්න ගියාම කොහොමද කියලා. ඉතින් ඒ වගේ රෝසි නෝනත් එයාට උවමනා දේවල් ‍තෝර ‍තෝර  තැනින් තැනට ගියා. 

කොහොමින් කොහොමහරි ටික වෙලාවක් ගිහින් රෝසි නෝනා රොබින්ව හොයන කොට රොබින් පේන්න හිටියේ නෑ..

" රොබීන් ... රොබීබීන්.. වෙයර්ආයු... " 

කිය කිය රෝසි නෝනා හැම තැනම රොබින්ව පැය ගානක් හෙව්වත් හොයාගන්න පුළුවන් වුනේ නැති නිසා අන්තිමට රෝසි නෝනා බොහොම දුකෙන් ගෙදර ගියා.

රෝසි නෝනා රොබින්ට හුඟක් ආදරෙයි කියලා මම කලින් කිව්වනේ. ඒ නිසා සල්ලි ගැන වත් හිතන්නේ නැතුව රොබින් හොයලා දුන්න කෙනෙක්ට රුපියල් 10,000.00 ක් දෙනවා කියලා ලොකු අකුරින් ලියලා පොස්ටර් එකක් ගහලා ටවුම පුරාම අලවන්න කටයුතු කළා.

ඔන්න ඔයාලටත් කොහේදිහරි රොබින්ව දකින්න හම්බුනොත් ඉක්මනින්ම රෝසි නෝනට දැනුම් දීලා සල්ලි ඉල්ල ගන්න. තාම රොබින් හම්බවුනේ නැති නිසා ඉතුරු විස්තරේ කියන්න වෙන්නේ ඊළඟ කොටසෙදි තමයි කියලා මතු සම්බන්ධයි  දැම්මොත් බැනුම් කෝටියක් අහන වෙන හින්දා කතාවේ ඉතුරු ටිකත් අදම ලියන්න හිතුවා. 

රෝසි නෝනව මග ඇරිලා ටවුමේ අතරමං වෙච්ච රොබින් සිරිපාල අහම්බෙන් වගේ දැක්කා.. සිරිපාල රොබින්ව දන්නේ එයා රෝසි නෝනගේ වත්තේ දවස් කීපයක් වැඩ කරන්න ගිහින් තිබුන නිසා. ඉතින් සිරිපාල රොබින් වත් එක්කගෙන රෝසි නෝනගේ ගෙදර ගියා. හැබැයි රොබින් හොයලා දෙන කෙනෙක්ට සල්ලි දෙනවා කියලා රෝසි නෝනා පෝස්ටර් ගහපු බවක් නම් සිරිපාල දැන්ගෙන හිටියේ නෑ.

රොබින්ව දැක්ක ගමන් රෝසි නෝනගේ සතුට ඉහවහ ගියා.. රොබිනුත් දුවලා දුවලා ගිහින් රෝසි නෝනා වටේ කැරකි කැරකි සතුට ප්‍රකාශ කලා. මේ සතුටත් එක්ක තෑග්ග ගැන රෝසි නෝනට අමතක වෙලා ගියා.. ඊටත් සිරිපාල ඒ ගැන දැනගෙන හිටියෙත් නෑ නේ. 


ඉතින් ඊට දවස් කීපයකට පස්සේ සිරිපාලට මේ තෑග්ගේ කතාව දැන ගන්න ලැබිලා අපහු රෝසි නෝනා හොයාගෙන ආවා. රෝසි නෝනා තෑග්ග දෙන්න හිතුවත් එයාගේ මහත්තයා ඒකට කැමති වුනේ නෑ.එයා ඉතින් පෙරකදෝරු මහත්ත්යෙක් නේ.. එයා මේක දිහා බැලුවේ තවත් එක නඩුවක් විදිහට. එයා කිව්වේ සිරිපාල තෑග්ග ගැන දැනගෙන හිටියේ නැති නිසා එයාල අතර වලංගු ගිවිසුමක් නෑ කියලා. ඒ නිසා තෑග්ග දෙන්න ඕනේ නෑ කියලා.

තෑග්ග ලැබෙන්න නම් දෙපාර්ශවයම අතරේ වලංගු ගිවිසුමක් තියෙන්න ඕනේ..  සරළව කියනව නම් තෑග්ග ගැන සන්නිවේදනය වෙලා තියෙන්න ඕනේ.. නීතියේ හැටියට කියනව නම් වලංගු ගිවිසුමක අර්පණයක් අර්පණලාභියාට මැනවින් සන්නිවේදනය වී තියෙන්න ඕනේ.. පෙරකදෝරුතුමා විස්තර කළා.

කොහොමින් කොහොම හරි සිරිපාලට තෑග්ග නම් හම්බවුනේ නෑ.

ඒ නිසා ඔයාලත් මේ වගේ කාටහරි මොනාහරි හොයලා දීලා තෑග්ගක් ගන්න හිතාගෙන ඉන්නවනම්, තෑග්ගක් දෙනවද කියලා කලින් ටිකක් හොයලා බලලා දැන ගන්න වෙනවා  :):)   නැත්තම් තෑගි නෑ හොඳේ  ...


Thursday, March 13, 2014

අනිද්දා ෆ්ලයිට් එකේ මම එනවා ...


හලෝ මුතූ... ඔයයි පුතයි සනීපෙන් නේද ?

ආ.. රමේෂ් .. ඔව්.. අපි සනීපෙන් .. ඔයා හෙට එනව නේද ?

 
බලන්නකෝ මුතූ.. අපේ බොස්ට චයිනා වල දාගත්ත මීටින් එකකට යන්න වෙන්නේ නෑ කියලා මට මේ ගමන්ම ඒකටත් ගිහින් එන්න කිව්වා ... 

 
අනේ රමේෂ්... එතකොට අපි අර ළමා නිවාසෙට දානේ දෙන්න දාගත්ත වැඩේට මොකද කරන්නේ ? ඔයාමනේ රමේෂ් කිව්වේ අපේ පැටියගේ  පළවෙනි උපන්දිනේ ළමා නිවාසෙක ළමයි ටිකක් එක්ක ගමු කියලා... ඔයා ඒකට නැතුව බෑනේ රමේෂ්...

ඔව් ඔව් මුතූ.. ඉතින් අහන්නකෝ... මට මේ වැඩේට යන්නම වෙනවා.. මෙහේ ඉදලා චයිනා වලට යන MH370 ෆ්ලයිට් එකේ ටිකට් එකකුත් බොස් මට බුක් කරලා.. මම හෙට මීටින් එකට ඉඳලා අනිද්දා ෆ්ලයිට් එකේ ලංකාවට එනවා.. ඔයා හොඳ ළමයා වගේ වැඩ ටික ලෑස්ති කරගන්නකෝ.. මම කෙලින්ම ළමා නිවාසෙට එන්නම්.. 

හා එහෙනම් ...  ඔයා මෙහේ වැඩ ගැන හිතන්න එපා .. මම ඒ ටික බලාගන්නම්.. අම්මලත් ඉන්නවනේ.. ඔයා කෙලින්ම ළමා නිවාසෙට එන්න එහෙනම්. 

මං අපේ පුතාටයි ළමා නිවාසේ ළමයින්ටයි චයිනා වලින් සෙල්ලම් බඩු ටිකකුත් අරන් එන්නම්.. ඔයා මං එනකන් පුතාව පරිස්සමින් බලගන්න..

මම ඊයෙ මහ නරක හීනයක් දැක්කා මුතූ.. බැරිවලාවත් මොකක් හරි වෙලා මට එන්න බැරි වුනොත් ඔයා හැමදාටම පුතාව හොඳින් බලා ගන්නව නේද ?  

මොනාද රමේෂ් මේ කියන්නේ.. ඔයා වැඩ ටික කරගෙන පරිස්සමින් අපි ගාවට එන්න.. 

මුතූ... මැලේෂියා වලින් යන්න කලින් සමහර විට මට අපහු කතා කරන්න බැරි වෙයි.. චයිනා වලට ගියාම කෝල් කරන්නම්.. 
 
හා .. කමක් නෑ.. ගිය ගමන් මට කෝල් කරන්න හොඳේ.. බායි.. බුදු සරණයි..

ඔයාටයි පැටියටයිත් බුදු සරණයි.. අම්මලත් මතක් කළා කියන්න ... බායි ... 

--------------------------------------------------------------------
 පසුදා ... 

අම්මේ දැන් නිවුස් යනව ඇති... දාන්නකෝ බලන්න ..

" මෙන්න දැන් ලැබුනු පුවතක් ... මැලේෂියාවේ සිට චීනය බලා ගමන් ගත් MH 370 මගී ගුවන් යානය අතුරුදහන් වී ඇති බව වාර්තා වෙනවා .. යානය සෙවීමේ කටයුතු මේ වන විටත් ආරම්භ කර තිබෙනවා ........... "

 
අම්මේ ... රමේෂ්............................  



~~~~~නම් ගම් පමක් මන:කල්පිතයි~~~~~





Friday, March 7, 2014

ළමා පිටියට පණ දුන් ඔහු නික්ම ගොසින් ...



 පසුගිය පෙබරවාරි 15 වෙනිදාව අතීතයට එකතුවුනේ වචනයේ පරිසමාප්ත අර්ථයෙන්ම සරළ මිනිසෙක් ලෙස නිහඬ සේවයක් කළ සොඳුරු මිනිසෙකුගේ අවසන් හුස්ම පොද වා තලයට මුසු කරමින්.
පුවත්පත් කළාවේදියෙකු, ගේය පද රචකයෙකු, ගුවන් විදුලි වැඩසටහන් සම්පාදක වරයෙකු, ජ්‍යෙෂ්ඨ නිෂ්පාදකවරයෙකු ලෙස ළමා, තරුණ, වැඩිහිටි කාගෙත් ආදරය දිනාගත් ඔහු නමින් මහින්ද අල්ගම.

ඔහුගේ පන්හිඳෙන් ලියවුනු ගී පද රචනා වෙනුවෙන් 2011 වර්ෂයේ රාජ්‍ය සංගීත උළෙලේදී මහගමසේකර අනුස්මරණ සම්මානයෙන්ද පිදුම් ලැබූ ඔහු  රුක්ත්තන මල මුදුනේ, චන්ද්‍ර මඩුළු යට, සඳ එළිය ඇවිල්ලා, රාන් කුරුල්ලා වැනි ගී ‍රැසකද හිමිකරුවාය. ඔහුගේ ගී පද රචනා පිළිබඳවත්, පුවත්පත් කලාවේදීත්වය පිළිබඳවත් බොහෝ දෑ පසුගිය වකවානුව තුල කථා බහට ලක්වුන නිසා ඒ පිළිබඳ වැඩි යමක් ලියන්න තුශානි අදහස් කරන්නේ නෑ. මේ සටහන තුශානි ලියන්න හිතුවේ ඔහු ඇසුරේ ගුරුහරුකම් ලබමින් තුශානි දැක්ක ඒ සොඳුරු නිහතමානී චරිතයේ බොහෝ දෑ අපි හැම කෙනෙකුගේම ජීවිත වලටත් වටිනා ආදර්ශයක් වෙන නිසාවෙන්මයි.

තුශානිට මුලින්ම මහින්ද මාමා මුණගැහුනේ ගුවන් විදුලිය තුල විකාශය වුනු ළමා පිටිය වැඩසටහනකට සහභාගී වෙච්ච අවස්ථාවකදී. මර්සි නැන්දගේ පොස්ට් එකේදි කිව්ව වගේ ගුවන් විදුලියේ ඇන්ටිලා අන්කල්ලා නැති නිසා මහින්ද අල්ගම චරිතය කා අතරත් ප්‍රසිද්ධ වුනේ මහින්ද මාමා කියල. මහින්ද මාමා ඉක්මනින් තරහ යන ටිකක් සැර කෙනෙක් වුනත් ඒ සැරවැර කම් අතරේ සැඟවිලා තිබුනේ ආදරණීය තාත්තා කෙනෙක් තමන්ගේ දරුවන් නිසි මගට ගන්න දරණ  ගන්න උත්සාහයක් සමඟ බැදිච්ච පිය සෙනෙහසක්.

ගුවන් විදුලිය තුල ඉහළ විනයක් හා ශික්ෂණයක් තිබිය යුතුයි යන්න තදින්ම විශ්වාස කල මහින්ද මාමා, මාධ්‍ය තුලින් ශ්‍රාවකයන් වෙතට යන සෑම දේකම සෑම වචනයක් පාසාම, හරවත් බවක් ‍රැඳී තිබිය යුතුයි යන දැඩි ප්‍රතිපත්තිය අනුගමනය කළ පුද්ගලයෙක්. ඒ නිසාම මහින්ද මාමත් එක්ක වැඩ කිරීම අපි හැම කෙනෙක්ටම ටිකක් අභියෝගයක් වුනා කිව්වොත් ඒකේ වරදක් නෑ. ඒ අතරෙන් මහින්ද මාමගෙන් බැනුම් අහපු නැති අය හිටිය නම් හිටියෙ හරිම සුළු පිරිසක්. කොහොම වුනත් වැඩසටහන අවසන් වෙලා මැදිරියෙන් එළියට එනකොට මහින්ද මාමගේ හිතේ වගේම අපි කාගේවත් හිත් වලත් බැනුමක සේයාවක් වත් ‍රැඳිලා නොතිබිච්ච බව නම් සඳහන් කළයුතුමයි.

මාධ්‍යය හසුරුවන කෙනෙකුට පුළුල් දැනුම් සම්භාරයක් තියෙන්න ඕනෙ කියන එක මහින්ද මාමා තදින් විශ්වාස කළ නිසාම ගුවන් විදුලි වැඩසටහන් මැදිරිය තුලට පමණක් කොටු නොකර මැදිරියෙන් පිට විවිධ ස්ථාන වල සිට ගෙන එන්න ලොකු වෙහෙසක් ගත්තා.

පහළින් තියෙන පින්තූරය ඒ වගේ මැදිරියෙන් පිට වැඩසටහනකට සහභාගි වෙච්ච වෙලාවක ගත්ත ඡායාරූපයක්.. එහි දෙවෙනි පේළියේ වම් පැත්තෙ ඉඳන් තුන්වෙනියට ඉන්නෙ මහින්ද මාමා ...



ඒ පින්තූරය තුශානිට බොහොම සතුටින් මතක් කරන්න පුළුවන් මතකයන් ගොඩක් එක්ක බැඳුනු හුඟක් වටින සිහිවටනයක් වුනත් අද ඒ පින්තූරේ දකින කොට තුශානිගෙ හිතට ලොකු දුකකුත් දැනෙනවා .. 

අපි හැදී වැඩුනේ බරපතල නීති රීති අතරේ වුනත් ඒ හැම දෙයක් තුලින්ම ඔහු අපිට කිසිදු තැනකින් ලැබිය නොහැකි ජීවිතය පිළිබඳ වු ගැඹුරු පාඩමක් ඉගැන්නුවා. ඒ වගේම අපි ලද ශික්ෂණය, විනය අපේ ජීවිත වලට ලොකු පන්නරයක් ලබා දුන්නා වගේම අදටත් ලබාදෙනවා. ශරීරයෙන් පුංචි මිනිසකු වු ඔහු යහපත් මාධ්‍ය කලාවක් උදෙසාත්, හරවත් හා නිවැරදි මාධ්‍ය භාවිතයක් උදෙසාත් සිය ආධුනිකයින් මෙහෙයවූ දැවැන්ත චරිතයක් ලෙසින් කාගේත් ආදරය දිනා ගන්නට සමත් වුනා. ශ්‍රව්‍ය මාධ්‍යයට නව කලාවක් හඳුන්වාදුන් ඔහු ළමා ලෝකය ජයගත් ලෝ ප්‍රකට ළමා පොත් සිංහලට පරිවර්තනය කරවමින් ළමා මනසට වටහාගන්නට පහසු ලෙස සරළ බසින් ළමා නාට්‍ය බවට පත්කරන්නට සමතෙක් වුනා.  සමනළ ලන්ද, දැනුම වැඩුම , රේඩියෝ රඟ මඩල, චාරිකා, ළමා ගී, වගේ විවිධ වු වැඩ සටහන්ද ඒ අතරින් කැපී පෙනුනා. 

මහින්ද මාමා නිෂ්පාදනය කළ ළමා වැඩසටහන් අතුරෙන් මාමා හුගක්ම කැමැත්තෙන් කලේ ළමා නාට්‍ය නිෂ්පාදනය කියලා කිව්වොත් ඒකට හැමෝම එකඟ වෙයි කියලා මම විශ්වාස කරනවා. ඒ අතරිනුත් ජිල් ජෝන් සහ ලන්දේසි දූපත, රූකඩ පැංචා, ගලිවර්ගේ චාරිකා, එමිලි, ඈන් වගේ ළමා නාට්‍ය ඉදිරියන් තියෙනවා. ළමා නාට්‍ය හා බැඳුනු තොරතුරු ගැන කියන්න බොහෝ දේ තිබුනත් අත් දිග කමිසයකින් සැරසිලා නාට්‍ය පිටපත් ටිකත් අරගෙන මැදිරියට එන මහින්ද මාමාගේ රුව මතක් වෙන වාරයක් පාසා හිතට දැනෙන දුක, ඒ අකුරු සියල්ල බොඳ කර හමාරයි.

ජනප්‍රියත්වය පසුපස හඹා නොයමින් සැමවිටම හරවත් සොඳුරු සිහිවටනයක් පරිපූර්ණව දැයට දායාද කළ ඔහු අද නික්ම ගොස් අවසානයි. ඔහුගේ අමිල මෙහෙය ගුවන් විදුලියට වගේම ලොකු කුඩා වැඩිහිටි හැමටම පිරවිය නොහැකි පාඩුවත් බව පත්ව අවසානයි. සැබවින්ම ජීවිතයේ සරළ බව, සැහැල්ලු බව අපට කියාදී අද ඔහු නො එන ගමනක් ගොස් අවසානයි. ඔබ තනන්නට වෑයම් කළ, අපට ගමන් කරන්නට මග පෙන්වු ලෝකය හැරදා ඔබ ගොස් අවසානයි.

ආදරණීය මහින්ද මාමේ ඔබට නිවන් සුව ලැබේවා ! 




Related Posts Plugin for WordPress, Blogger...